Verlede jaar het die Maart-geleentheid op ’n hoogtepunt begin toe pres. Cyril Ramaphosa, medeteler, die kommunikasieoggend bygewoon en ’n paar gedagtes aan die gaste oorgedra het.
Dit is opgevolg deur die res van die kommunikasie-oggend en jaarvergadering, waarna alles gereed gekry is vir Bonsmara- teelmateriaal.
Die Rooi Ras-geleentheid is uitstekend bygewoon deur stoet- en kommersiële telers, asook ander belangstellendes. Met bekwame ontleders, soos mnre. Theo Vorster en Wandile Sihlobo, kon gaste weer ’n idee kry waar die landbou staan ten opsigte van die politieke en die ekonomiese landskap.
Daarna het mnr. Chris Visser van Skatkis Bonsmaras vertel van sy ervaring om op kort kennisgewing aan die Dakartydren deel te neem en hoe deursettingsvermoë hom gehelp het om dié strawwe motorwedren te voltooi.
Die veiling van 2022 het hoogtepunte opgelewer met verskeie rekordpryse wat behaal is. Lot 9 met uitstekende koeie (3-in-1) uit die Up George Bonsmaras- stal van mnr. Derek en me. Tutu Ralfe is vir R550 000 aan Tambaraine Bonsmaras van mnr. Eloff Muller van Mosselbaai verkoop. Nog Up George Bonsmaras- teelmateriaal, naamlik ’n dragtige vers, is vir R200 000 deur Boschhoek Bonsmaras van mnr. André van der Heyde van Roedtan verkoop. Talle ander diere op die veiling het ook uitstekende pryse behaal.
Waarna om uit te sien
Vanjaar se geleenthede van Bonsmara SA beloof om inhoud te bied wat min mense in die beesbedryf kan misloop. Die verrigtinge begin op Dinsdag 14 Maart vir stoettelers met die kommunikasie-oggend en jaarvergadering. Dié verrigtinge is slegs vir telers.
Daarna vind die nasionale veiling se “Kyk Weer” plaas, waar daar besigtiging van die diere op aanbod is, asook ’n geleentheid om te sien hoe streng Bonsmara SA sy rasstandaarde ag. Alle belangstellendes kan dit bywoon.
Op Woensdag 15 Maart begin die Rooi Ras-verrigtinge om 08:30 by die Stonehenge River Lodge op Parys. Dr. Frans Cronjé gaan lig werp op wat Suid-Afrikaners van die politieke landskap kan verwag. Is Suid-Afrika dalk besig om ’n keerpunt te bereik?
Die oggend word afgesluit met ’n motiveringspraatjie van mnr. Braam Malherbe, ’n avonturier wat al verskeie veeleisende avonture aangepak en voltooi het. In tye met soveel onsekerhede kan almal krag en hoop uit sy praatjie put.
Daarna word na die Afridome op Parys beweeg, waar die veiling om 12:00 sal begin. Dit is ’n hoogtepunt op die veilingskalender, want dit bied kopers die geleentheid om uitsoek- teelmateriaal van kuddes reg oor Suid-Afrika op een plek te bekom. Die aanbod sal weer slegs vroulike diere wees.
Met 105 produksieveilings jaarliks is daar genoeg plekke waar belangstellendes die beste bulle in hul omgewing kan koop. Hierdie uitstekende vroulike diere stel die maatstaf vir funksionele, doeltreffend aangepaste Bonsmaras. Bonsmara SA nooi almal om die verrigtinge by te woon en mee te doen in die fees om ’n Bonsmara-boer te wees.
Program vir 15 Maart
08:30: Rooi Ras-geleent- heid, Stonehenge River Lodge, Parys
12:00: Bonsmara SA se nasionale veiling, Afridome, Parys
