Optimale graanopbrengs is die resultaat van deurdagte beplanning en doeltreffende gewasbestuur. Produktiwiteit en winsgewendheid word egter in wins/ha en nie slegs in ton/ha gemeet nie. Verhoogde winsgewendheid kan net bereik word wanneer die gewas behoorlik in ooreenstemming met ander produksie-elemente bestuur word.
Volgens mnr. Andries Wessels, bestuurder: saadverkope en -produkontwikkeling by Syngenta, word koringopbrengs deur die aantal plante per hektaar, die aantal are per plant, die korrelgetal per aar en die individuele graankorrelmassa bepaal.
Kultivars reageer nie eenders op die omgewing en produksietoestande nie. Daarom is kultivarkeuse ’n bepalende faktor wanneer dit by opbrengs en wins kom. Produsente moet aspekte soos opbrengspotensiaal, aanpasbaarheid, stabiliteit, graangehalte, staanvermoë en siekteverdraagsaamheid van ’n kultivar in aanmerking neem.
Sekere kultivars presteer beter by ’n laer opbrengspotensiaal, terwyl ander weer gedy onder hoë-opbrengspotensiaal-toestande. Sekere kultivars is wyd aangepas, maar kan dalk te kort skiet as dit by siekteverdraagsaamheid kom. Dit is ook belangrik om te onthou dat ’n hoë opbrengs soms negatief korreleer met eienskappe soos proteïeninhoud, bakgehalte en hektolitermassa.
Dit is raadsaam om teen ’n hoër stand te plant indien laat geplant word omdat die vegetatiewe groeityd ingekort word. Dit beïnvloed die kultivar se stoelvermoë. Om hierdie situasie te bestuur, moet plantdigtheid hoër aangepas word hoe later geplant word.
Genetiese diversiteit vorm die hartklop van Syngenta se koringteelprogramme en daarom is die maatskappy in staat om nuwe en goeie kultivars te ontwikkel en te kommersialiseer.
Inligting waarop die beskikbaarstelling van kultivars en ook die boer se keuse gegrond word, word ingesamel deur strook- en multi-jaarproewe. Hieruit word nuwe lyne uit die teelprogram geëvalueer om uiteindelik as kultivars beskikbaar gestel te word.
Die data wat uit die strookproewe genereer word, reflekteer ook die statistiese navorsingsproewe wat oor jare geplant word in al die belangrike produksiegebiede. Hierdie data gee ’n goeie aanduiding van hoe stabiel en aangepas ’n kultivar is.
Syngenta beveel ’n kultivarpakket aan vir goeie risikoverspreiding. Medium-, mediumkort- en kortgroeitydkultivars sal die aangewese produkte wees om te oorweeg vir later aanplantings omdat hulle beter aangepas is vir die middel tot laat tydperk van die planttydgleuf.
Koring het ’n belangrike plek in ’n wisselboustelsel saam met somergewasse soos sojabone, droëbone, sonneblom, mielies en katoen in die besproeiingsgebiede van Suid-Afrika. Lentetipes koring wat in die laatherfs en winter aangeplant word, is geskik vir besproeiing.
Produsente kan hul besproeiingskoringpakket uit die volgende produkte saamstel.
- * SST 884 – ’n Kortgroeityd-besproeiingskultivar met goeie opbrengspotensiaal. Wanneer die risiko groot is vir laat koue en ryp, is hierdie moontlik die ideale keuse omdat die plantdatums aangepas kan word.
- * SST 8135 – ’n Kort tot mediumgroeityd-besproeiingskultivar met goeie opbrengspotensiaal.
- * SST 8154 – ’n Kortgroeityd-besproeiingskultivar met goeie opbrengspotensiaal, staanvermoë en graangehalte.
- * SST 8156 – Hierdie hoëpotensiaal-semi-dwergkultivar het ’n mediumgroeityd en is wyd aangepas vir vroeë en middelseisoenaanplantings. Dit bied goeie uitloopweerstand en matige weerstand teen stam- en geelroes. SST 8156 se pitvastheid is goed en die graangehalte is uitstekend.
- * SST 8205 – ’n Mediumgroeityd-besproeiingskultivar met uitmuntende opbrengspotensiaal.
