’n Damsak is ’n geslote houer waarin vloeistowwe soos water opgegaar kan word. Dit is met ander woorde ’n reservoir of opgaardam. Damsakke word vervaardig uit voedselgraadplastiek soos poliësterbewapende PVC. Dit is is nie stram of harde plastiek soos die watertenks wat die meeste mense goed ken nie, maar eerder soos topgehalte-seile vir vragmotors.
Die sak is ’n toe houer en bewaar die vloeistof of water sonder dat dit besoedel of verdamp. Dit hou ook sonlig uit, wat verhinder dat alge in jou Damsak groei.
Damsak is in 2007 deur prof. Gordon Bredenkamp ontwerp en vervaardig vir private gebruik. Vyf jaar later was dit duidelik hoe goed Damsak werk. Dit is in 2012 vir die eerste keer op die Nampo-oesdag uitgestal. Sedertdien het ál meer boere die voordele van hierdie sak raakgesien. Dit word vandag met groot sukses op talle plase gebruik.
Damsakke word gebruik in enige situasie waar water opgegaar moet word. ’n Goeie voorbeeld is waar ’n boorgat of windpomp vir lang ure aanmekaar moet werk om genoeg water te lewer om ’n landery te besproei of wanneer al die beeste op een slag kom suip en jy het ’n groot hoeveelheid water skielik nodig het. Dié sakke is ’n goeie plaasvervanger vir die ronde sementplaasdam wat op die meeste plase gevind word. Dis met ander woorde ideaal vir die opgaar van water waar die waterbron en die watergebruik nie gesinkroniseer is nie.
Anders as ’n sementdam wat die potensiaal het om te kraak, neem Damsak sy vorm aan namate die water intap. Kraak is dus nie moontlik nie. Dis ook heelwat goedkoper om te installeer as om ’n sementdam te bou.
Omdat Damsak van seil gemaak is en geen vaste strukture vereis nie, kan dit maklik op die plaas geskuif word. Sodra die sak leeg is, vou jy hom op, laai hom agter op die bakkie en gebruik hom weer op ’n ander plek waar jy saai of jou vee geskuif het vir weiding. Dit is dus maklik om met jou reservoir jou aktiwiteite op die plaas te volg.
Die sakke kom in verskillende groottes wat wissel van so klein as 500 liter tot so groot as 250 000 liter.
Die voordele van Damsak in ’n neutedop is dus:
- Vinnige installasie.
- Geen struktuur is nodig nie.
- Dis goedkoper as om ’n sementdam te bou.
- Omdat daar nie voorwerpe van buite in die dam kan beland nie, is dit ideaal vir onder meer drupbesproeiing.
- Dit kan nie kraak of lek soos tradisionele plaasdamme nie.
