In 1928 was Hippo-hamermeulens ’n markleier danksy sy unieke gietysterkonstruksie. Deur die jare het dié maatskappy ’n volledige reeks hamermeulens ontwikkel. Hippo-meulens word sedert 2008 deur ABC Hansen vervaardig en staan as markleier sy plek vol, veral in die nywerheids- en kommersiële marksegment. Die meule vind in dié markte byval vanweë sy gietysterkonstruksie en die maklike vasbout van alle onderdele met minimum sweiswerk, wat krake in die konstruksie voorkom, veral van masjiene wat elke dag, heeldag werk.
Sedert 2008 het ABC Hansen verdere ontwikkeling gedoen wat gelei het tot ’n besonderse invoermeganisme wat voorkom dat die meule oorlaai word en verseker dat dit teen konstante doeltreffende kapasiteit bedryf word. Die aandrywingbasisse is ook vergemaklik, vurkhyservriendelik gemaak en alle modelle is vir die eerste keer gemetriseer. Gehaltelaers word gebruik omdat die meulens teen ’n hoë spoed bedryf word. ’n Uitgebreide stoffilterontwerp en doeltreffender siklone verseker dat stof verminder word.
In 2022 het ABC Hansen besluit die grootste ongunstige aspek van alle hamermeulens, naamlik stof, moet meer aandag kry. Die ontwerp van die lugvervoerstelsel – ook uniek aan Hippo – is drasties verander sodat alle Hippo’s wat vanaf 2023 verkoop word, stofvry bedryf kan word. Dit is danksy negatiewe druk met ’n unieke meganiese gravitasiedrukklep. In die min gevalle waar besonder ligte materiaal gemaal word, kan dit nodig wees om ’n elektries gedrewe roteerklep te gebruik.
Die beste nuus is egter dat die prys van alle Hippo-modelle nie hierdeur beïnvloed word nie, behalwe as die elektriese roteerklep gebruik moet word.
Die uitwerking van stofvrye maal, is nie alleen ’n baie gesonder werkplek nie, maar ook ’n drastiese vermindering van produkverlies wat deur stof veroorsaak word.
Die nuwe DF-modelle kan nou bestel word vir die Hippo Baby, model 1, model 1½, die modelle 47, 57 en 69, asook die L63, en Mammoth wat reeds ’n paar jaar gelede met negatiewe druk op aanvraag gebou is. Dit is slegs die Hippo Pygmy van 2,2 kW wat nie oor ’n lugvoerstelsel beskik nie.
’n Verdere ontwikkeling is dat die Bennox-staalhamers afgewissel kan word, of heeltemal vervang kan word met ultraskerp geslypte driehoekige Bennox- of Hardox-lemme wat die maal van produkte met ’n besonder hoë veselkomponent vergemaklik en kapasiteit verhoog.
Hippo-hamermeulens word bestempel as ’n meule vir ’n leeftyd en word reg oor die wêreld uitgevoer. Elke meule word ekstensief getoets voor dit die fabriek verlaat en advies aan klante, asook die toetsmaal van enige moontlike moeilike produk word gratis gedoen om die beste resultaat te lewer.
