Daar is ’n hele paar baie goeie redes waarom die Santa Gertrudis produsente se voorkeurkeuse as beesras moet wees. Benewens die feit dat Santa Gertrudis-beeste gou en maklik aanpas by ’n groot verskeidenheid van klimaatstoestande in Suid-Afrika en die res van Afrika, weeg dié mediumraam-vleisbees se bulle 900 kg en meer, en volwasse koeie van 550 kg tot 650 kg. Hierdie donkerrooi vleisbeesras met ’n gladde haarkleed is net reg saamgestel vir toekomstige behoeftes in Suid-Afrika.
Santa Gertrudis-beeste bied die teler ’n kombinasie van gehardheid en goeie vleis, asook bemarkbaarheid vanaf veld of aangeplante weidings. Die gehardheid kan gesien word in hul goeie loopvermoë. Hulle kan lang afstande aflê op soek na kos en water. Dié beeste is ook uitstekende grasvreters.
Ook as dit kom by teel, bied hierdie ras heelwat vir die boer om mee te werk. Bulle kan met gemak gebruik word om te teel tot die ouderdom van 14-15 jaar en vroulike diere kan nog topkalwers teel tot 13-15 jaar.
Die kalwers se daaglikse gewigstoename per ouderdom (GDO) is konstant. ’n Gewigstoename van 1,5-2 kg per dag is maklik bereikbaar op goeie weiding en selfs meer in ’n voerkraal. Santa-kalwers wissel eers op ongeveer 26 maande en is dan steeds ’n A-graad.
Uitslagpersentasie is bogemiddeld
Santa Gertrudis beeste het ’n bogemiddelde uitslagpersentasie en is daarom baie gewild in voerkrale en op veilings. Die Santa-karkas is ook bekend om goeie vetverspreiding, met ’n uitstekende karkasgehalte. Die voeromsettingsverhouding is van die beste in Suid-Afrika.
Hierdie ras se koeie lewer bogemiddelde melkproduksie en is bekend om hul natuurlike vermoë vir die versorging van hul kalwers. Die kalwers word gemaklik gebore en is gehard.
Santa Gertrudis-koeie is bekend dat hulle kalwers lewer met ’n lae geboortegewig en vinnige gewigstoename daarna. Sterk, gesonde kalwers beteken dat ’n hoër persentasie kalwers gespeen word vir wins. Die naspeen-groeivermoë is ook uitstekend.
