Kort ná die begin van die vorige eeu kom voormalige teenstanders, aan Boer- en Brit-kant, bymekaar en begin bou aan ’n gesamentlike toekoms, asook om te sorg dat geneties meerderwaardige diere in Suid-Afrika geteel sal word. Hierdie Stamboek-storie loop saam met ander baie belangrike stories. As jy jou oor teen die grond en naby die gemeenskap hou, hoor jy die storie van toegewyde boere wat ’n lewe maak van wat die grond, plante en ander natuurlike hulpbronne hulle bied. Hierdie stories loop reg deur goeie, maar ook moeilike jare. Dit loop deur politieke veranderinge en markte wat nie meer dieselfde lyk as ’n eeu later nie.
Tegnologie en wetenskap
Daar is nog belangrike verhale wat ontvou. Een van die belangrikste is van tegnologie en wetenskap-ontwikkeling. Enige veeboer wat wil gedy, het geen ander keuse nie as om tegnologie te omarm, en dit reg te gebruik. Die suksesvolle telers weet hoe om die kaf van die koring te skei en die wetenskap reg aan te wend.
Stamboek se storie loop hand aan hand hiermee. Hierdie vereniging van telersgenootskappe ken die wetenskapverhaal, weet hoe rekenaarkrag reg aangewend kan word, beskik oor die tegniese kennis, kapasiteit en ervaring, en ken ons telers se storie.
Hier en nou
Indien jy ernstig is oor wat in jou kudde aangaan en jy jou mark tevrede wil stel sodat jou onderneming se storie nie sal doodloop nie, moet jy deel wees van iemand wat jou en jou diere se belange op die hart dra. Stamboek en ons mense is nie ’n fabel van lank, lank gelede nie, ons is hier en nou. Stamboek is in pas met die werklikheid en elke teler en sy onderneming se verhaal.
Daarom vorm ons deel van die dinkskrums van telersgenootskappe en hul tegniese of rasverbeteringskomitees, en pas ons aan en gee leiding waar nuwe idees nodig is. Dit is om in pas te wees met die jongste ontwikkelings op gebiede soos meta-data en outomatisering, genomiese seleksie, uitkoms-gebaseerde seleksiepraktyke, die aanwending van data om ingeligte bestuursbesluite te neem, en pasmaakraad wat by elke teler en eienaar van diere se behoeftes pas.
Een van die hoogtepunte op Stamboek se jaarlikse storielyn is hierdie bylae wat deel vorm van ons verhouding met Landbouweekblad. Die jaar 2023 is geen uitsondering nie. Suksesvolle, moderne diereteling en die beste aanwending van inligting loop hand aan hand met oop ore en oë vir inligting. Dit is die inligting wat Stamboek graag oordra.
Ons kry die stories bymekaar van wat besig is om te gebeur in diereteling en hoe om dit reg aan te wend vir suksesvolle seleksie sodat elke gebruiker van ons dienste goeie besluite kan neem. Sodoende beland jy nie in ’n doodloopstraat met jou kudde nie. Elke teler en eienaar van diere moet sy of haar eie verhaal skryf en is verantwoordelik om met sorg om te gaan met die hulpmiddels wat Stamboek beskikbaar stel. Geniet die artikels in hierdie bylae.
Daar word vertrou dat dit ook die honger na meer kennis nóg groter sal maak, en dat elke teler by die regte deur sal bly aanklop. Agter hierdie deur word daar vir elkeen ruimte geskep deur ’n span met die nodige kennis en ervaring, en ’n bewese stelsel wat werk vir elke veeboer se behoeftes. Stamboek bied hierdie geleenthede, want ons weet elkeen het ’n eie storie. Ons storie is verweef met joune.
Dr. Japie van der Westhuizen is die hoofbestuurder van SA Stamboek.
