Weersomstandighede is bepalend vir die doeltreffende toediening van gewasbeskermingsprodukte, grootliks omdat water as draer vir die chemiese middels gebruik word. Waterdruppels kan maklik deur wind van koers af gewaai word, ’n verskynsel bekend as wegdrywing, wat verhinder dat hulle hul teiken bereik. Humiditeit of lugvog is ook ter sake. Wanneer die lug te droog is, verdamp water vinniger met die gevolg dat die chemiese middel sy draerkomponent verloor en die produk nie tot by die teiken gedra kan word nie.
Verdamping en veral wegdrywing het ’n regstreekse impak op winsgewendheid. Daar word bereken dat tot 50% van die aktiewe bestanddeel in ’n produk verlore gaan wanneer wegdrywing plaasvind – dit wil sê dat die helfte van die geld wat jy op die produk uitgegee het, letterlik deur die wind weggewaai word.
Die ekonomiese noodsaaklikheid om wegdrywing te voorkom, gaan hand aan hand met ekologiese en volhoubaarheidsredes. Plante en diere in die omgewing rondom die toedieningsarea moet beskerm word, asook die volgehoue doeltreffendheid van die chemiese middels. Suboptimale toedienings en dosisse dra by tot die ontwikkeling van weerstand wat op lang termyn rampspoedige gevolge vir die produkdoeltreffendheid inhou.
Al hierdie probleme word nou deur Cropwise Spray Assist, Syngenta se nuttige nuwe mobiele toepassing, aangepak. Die toep is gratis in die Google Play Store en die Apple App Store beskikbaar om op jou slimfoon afgelaai te word, kan enige plek in Suid-Afrika gebruik word en verskaf tans spuitprograminligting vir 14 verskillende gewasse, insluitend mielies, sojabone, suikerriet, sonneblom, kleingrane en verskeie groentegewasse.
Spray Assist gebruik weerdata vir die beoogde spuitarea om vyf dae vooruit vir produsente aan te dui wanneer omgewingstoestande suksesvolle en akkurate toediening sal verseker. Uurlikse spuittydgleuwe vir optimale toediening word bereken op grond van verwagte windrigtings en -snelhede, asook relatiewe humiditeit of lugvog. Sodoende kan jy vooruit beplan en boekhou van toedieningstye en weersomstandighede.
Die tegnologie gaan egter ’n stap verder. Dit gee aanbevelings vir watervolume per hektaar, trekkerspoed en die spuitpunte en instellings wat op die spesifieke gewas in die heersende omgewingstoestande gebruik moet word.
Met die hulp van hierdie tegnologie word wegdrywing beperk of heeltemal voorkom. Dit keer dat duur gewasbeskermingsprodukte vermors word en dat nie-teikengewasse en -plante nadelig beïnvloed word. Die korrekte spuitpuntkeuse verseker verder dat die produk die teiken bereik en behoorlik bedek vir optimale doeltreffendheid.
Cropwise Spray Assist haal, kortweg gestel, die raaiwerk uit jou spuitwerk.
