Die Nooitverwag Beefmaster-stoetery bestaan al sedert 1993, met streng seleksie en rekordhouding die grondslag van sy sukses. Die beginsel van goeie bestuur en ’n sterk administratiewe stelsel is baie belangrik vir dié stoetery, daarom is sy leuse: Elke koei moet elke jaar ’n goeie kalf speen.
Die afgelope 29 jaar het die kudde dié eerbewyse ontvang:
- 1997 – spesiale meriete-eerbewys vir Vleisbeeskudde van die Jaar.
- 1998, 1999, 2001, 2005, 2007, 2010 en 2013 – finalis vir Vleisbeeskudde van die Jaar.
- 2000, 2002, 2003, 2004, 2006, 2008, 2009 en 2011 – wenner vir Vleisbeeskudde van die Jaar vir die Mpumalanga-streek.
- 2003, 2005, 2006, 2007 en 2015 – Farmer’s Weekly se Elite-koei. 2016 – Landbouweekblad en SA Stamboek se Elite-Platinumkoei. 2017 – Veeplaas en SA Stamboek se Elite-Platinumbul.
In 2020 het Nooitverwag ’n besonderse prestasie behaal toe hy SA Stamboek se Elite-Platinumbul opgelewer het en dié bul se moeder ook die Elite-Platinumkoei was.
Die kudde word in twee boerderye bestuur deur mnre. Kerneels Jansen van Rensburg op die plaas De Vereeniging en Gerrie Jansen van Rensburg op die plaas Drinkwater, albei in die distrik Ermelo.
Streng seleksie vir vrugbaarheid, groei en reproduksie word toegepas. Sodoende verbeter die kudde jaarliks. Noukeurige seleksie van teelbulle en die gebruik van Blup-teelwaardes bevorder die hoofdoelwit met die kudde, naamlik maksimum wins uit elke koei.
“Ons hou die afgelope 15 jaar baie suksesvolle produksieveilings, en op 12 Julie is ons 15de een op De Vereeniging,” sê mnr. Gerrie Jansen van Rensburg. Nooitverwag Beefmasters sal ook op 7 Julie by die nasionale Beefmaster-veiling op Parys wees.
