“Dis nie lekker as so iets in
jou winkel gebeur nie, maar ek is dankbaar dat Jean iets gedoen het om te help
en nie net weggekyk het nie.” Só vertel mnr. Edu Hanekom, eienaar van The Boer
and Butcher-onderneming wat vyf slaghuise in die Wes-Kaap besit.
In ’n voorval op 23 Januarie wat op die winkel in die Paarl se veiligheidskameras vasgevang is, kan gesien word hoe ’n man produkte in die winkel in sy sak steek terwyl hy rondkyk om seker te maak dat iemand hom nie sien nie.
Jean de Villiers, oud-Springbok, en sy eggenoot, Marlie, was besig om inkopies te doen en het opgelet dat die man verdag optree. Hulle het opgelet dat die man uit die winkel stap nadat hy artikels gevat het en Jean besluit om die man agterna te sit. “Toe hy na die man roep, het hy begin hardloop. Jean het sy plakkies uitgeskop en die man agternagesit. Hy’t die man net buite die winkel gevang en teruggebring,” vertel Hanekom.
Hanekom sê die man het onder meer sjokolade gesteel. Hy is aan die sentrum se sekuriteitspersoneel oorhandig, wat die situasie verder hanteer het.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
