Voorspellings toon dat die koue front Saterdagaand en vroeg Sondag vanuit die suidweste oor die land gaan inbeweeg.
“Redelik goeie neerslae van 20 mm of meer is moontlik van 18 tot 21 Maart af oor veral die Swartland, die aangrensende Wynland-distrik en die Kaapse metropool,” sê mnr. Johan van den Berg, onafhanklike landbouweerkundige. “Ligter neerslae van tot 10 mm is moontlik aan die Weskus en oor die aangrensende binneland tot so ver as Springbok. Neerslae van 10 mm tot 15 mm kan oor die Overberg en Suid-Kaapse kus voorkom.”
Ligte neerslae van sowat 5 mm kan op Sutherland, Williston, Calvinia en Beaufort-Wes voorkom.
Indien hierdie reën oor veral die Swartland gaan val, kan dit baie beteken vir wintergraanprodusente om grondvoorbereidings te kan doen vir aanplantings in Mei, sê Van den Berg.
“Die afgelope paar seisoene het die eerste reën eers teen einde Mei voorgekom. Boere moes dikwels met min ondergrondse vog plant om betyds geplant te kon kry. In ’n soortgelyke jaar, in 2012, met die oorgang van La Niña na neutrale toestande, het dit ook redelik goed gereën in Maart, maar veral in April en Mei, terwyl Junie en Julie se reën ondergemiddeld was. In Augustus 2012 en die eerste deel van September is bogemiddelde reën weer aangeteken.”
In 2012 het die Overberg, en spesifiek Bredasdorp, bogemiddelde reënval gemeet van Maart tot Augustus, maar September was droër.
Lae temperature
Temperature oor die sentrale, westelike en suidelike binneland kan weens die koue front skerp daal van 17 Maart af, maar veral vanaf 18 Maart. “Maksimum temperature kan tot tussen 10 °C en 15 °C daal. Op Malmesbury in die Swartland kan die maksimum temperatuur daal vanaf 37 °C op 16 Maart tot 23 °C op 18 Maart en verder tot 21 °C op 20 Maart.”
Lae minimum temperature is egter ’n bron van kommer, sê Van den Berg. “Op plekke soos Ceres en De Doorns kan dit tot so laag as 7 °C daal en in die sentrale tot westelike binneland van die somerreëngebied tot onder 10 °C by Prieska, Bothaville, Bethlehem en Bloemfontein.
“Hoewel die kans op ryp skraal is vir die tydperk van 18 tot 21 Maart, is dit nie uitgesluit nie. Temperature onder 10 °C kan egter die groei en ontwikkeling van somergraangewasse soos sojabone en mielies benadeel,” sê Van den Berg.
Weermodelle dui tans aan dat frontale stelsels die volgende twee weke verdere reën en koue toestande kan veroorsaak. Van 24 tot 27 Maart kan ’n volgende frontale stelsel verdere reën na die Wes-Kaap bring, terwyl temperature weer skerp kan daal oor die suidelike en sentrale binneland.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
