Die kusdorp Kleinemonde, naby Oos-London aan die Oos-Kaapse kus, het Sondagnag meer as 100 mm reën gemeet, met baie sterk wind wat skade aan huise veroorsaak het. “Met die begin van die oorskakeling van die winter- na somerreënpatrone kan gedeeltes van die Oos-Kaap reën en hewige storms verwag,” sê mnr. Johan van den Berg, onafhanklike landbouweerkundige. “Die kans is goed dat verdere stormagtige toestande veral rondom September en Oktober teen die Oos-Kaapse kus kan voorkom.”
Voor dié weer die land gaan raak, gaan ’n koue front later die week oor die land beweeg met skerp dalings in minimum temperature van 11 tot 18 Augustus oor die winterreëngebied. Van Saterdag tot Maandag (13 tot 15 Augustus) word minimum temperature van -6 °C in die distrik Ceres voorspel, terwyl die kwik dan in die Hexriviervallei tot so laag as -3 °C kan daal.
Die #SAWEERDIENS het die volgende Geelvlak 2 Impak #waarskuwing vir sterk #wind en hoë #deinings en 'n Weeradvies vir #Koue weer uitgereik 11-08-2022#waarskuwings #wees_veilig
— ReenvalSA (@ReenvalSA) August 11, 2022
??Jan Meyntjes vir SAWS@SAWeatherServic@ewnreporter @peoples_weather @AfricaWeather_ @VoxWeatherZa pic.twitter.com/dUE6C0Ripo
Minimum temperature van onder vriespunt kan ook in die Rûensgebied en die binneland van die Suid-Kaap voorkom. Maksimum temperature kan tot onder 12 °C daal van Vrydag tot Sondag (12 tot 14 Augustus), en vir die res van Augustus kan dagtemperature vir die grootste deel van die winterreëngebied rondom 15 °C wees. “Warmer toestande word verwag vanaf die begin van September, hoewel sporadiese dalings steeds kan plaasvind.”
Van den Berg sê veral die suidelike en suidoostelike dele van die binneland gaan die komende naweek in die greep van die koue front wees. Skerp temperatuurdalings en ryp kan voorkom. “In die Benede-Oranjerivier op plekke soos Douglas, Prieska, Upington, Kakamas en tot so ver as Onseepkans kan ryp van Saterdag tot Maandag voorkom en skade veroorsaak.”
Minimum temperature onder vriespunt word ook verwag in die Oos-Vrystaat met ’n plek soos Reitz waar temperature tot -3 °C kan daal en by Ficksburg tot -5 °C. Die Hoëveld van Mpumalanga kan ook baie koue toestande verwag op plekke soos Standerton, Bethal en Ermelo. “Baie koue toestande kan oor die noordelike dele van die Oos-Kaap voorkom met die kwik wat by Cradock tot -3 °C kan daal en by Barkly-Oos tot -7 °C.”
Van den Berg sê baie min of geen ryp word vir Limpopo verwag nie, hoewel temperature tot onder 5 °C kan daal van Saterdag tot Maandag op plekke soos Thabazimbi, Roedtan en Groblersdal.
Sneeu en reën
Van Woensdag tot volgende Woensdag (10 tot 17 Augustus) lyk reënvalvooruitsigte ietwat beter vir veral die Swartland, die Kaapse Metropool en die Wynland-distrik. Rondom 20 mm is moontlik oor die Swartland en Kaapse Metropool en meer as 30 mm oor die Wynland-distrik van die Wes-Kaap.
“Heelwat minder reën word egter verder noord langs die Weskus en in die aangrensende binneland op plekke soos Clanwilliam verwag. Minder reën word ook voorspel vir die Rûens en gebiede langs die Suidkus, met minder as 15 mm wat verwag word tot 20 Augustus,” aldus Van den Berg. “Verdere winterreën is moontlik teen einde Augustus en in die eerste week van September, maar dit sal na verwagting weer meer gekonsentreer wees oor die Swartland, die Wynland-distrik en die Kaapse Metropool.”
Met die baie koue toestande en reën wat oor die suidelike dele van die land verwag word, is daar ’n redelik goeie kans vir die voorkoms van sneeu vanaf Saterdag oor die Wes-Kaapse berge. Die toestande kan uitbrei na die suidelike dele van die Noord-Kaap en dan na die Oos-Kaap en Lesotho Saterdag en Sondag. “Redelike swaar neerslae is moontlik oor die hooggeleë gedeeltes. Dit behoort redelik vinnig op te klaar vanaf Sondag, maar gaan steeds sorg vir baie koue toestande.”
