Die huidige La Niña-verskynsel het begin verswak met seeoppervlaktemperature in die Niño-gebiede wat tans tussen 0 °C en 0,9 °C koeler as normaal is, nadat ’n laagtepunt van 1,1 °C koeler as normaal vroeër dié somer aangeteken is. Mnr. Johan van den Berg, onafhanklike landbouweerkundige, sê ten spyte van die verswakking is die meeste aanduiders steeds sterk La Niña-neigend. “Die Australiese buro vir meteorologie (BOM) toon dat passaatwinde in die westelike Stille Oseaan weer versterk het en dat die Suidelike Ossilasie-indeks (SOI) ook steeds in ’n positiewe of La Niña-neigende fase is, wat albei tekens is dat atmosferiese toestande steeds La Niña neigend is.”
Van den Berg sê hoewel daar ’n kans van 45% tot 50% bestaan dat die La Niña-stelsel gedurende die winter en moontlik in die somer van 2022-’23 gaan voorkom, is daar steeds onsekerheid oor die voorkoms daarvan aangesien die wintermaande baie wisselvallig is en baie kan verander ten opsigte van die temperature in die Niño-gebiede. “Wat wel afgelei kan word, is dat die kans op El Niño-toestande redelik skraal is. Die kans is slegs 10-15% dat dit in die 2022-’23-seisoen gaan voorkom. Die mees moontlike scenario tans is dat dit of La Niña-neigend gaan wees, of ’n 40%-kans dat die Niño-gebiede neutraal gaan wees.”
Van die ander elemente wat in die volgende somer ’n rol kan speel, is die Indiese Oseaan. Van den Berg sê tans is voorspellings vir temperature in die westelike Indiese Oseaan weer soos die afgelope seisoen, normaal of koeler as normaal.
