Die binneland en kusgebiede in die noorde en suide van KwaZulu-Natal het groot skade gely weens swaar reën en oorstromings, sê me. Sandy la Marque, uitvoerende hoof van die KwaZulu-Natalse landbou-unie (Kwanalu). Verdere skade word steeds aangemeld.
Sy sê weens ernstige skade aan infrastruktuur, veral paaie en brûe, is die beweging van goedere en dienste tans baie beperk. Toegang tot aflewerings- en afhaalpunte vir tydsgevoelige landbouprodukte en -voorrade, veral spesifieke insette wat deur Durbanhawe ingevoer moet word, sal volgens haar ’n regstreekse impak op die landbousektor hê.
La Marque sê alles moontlik moet gedoen word om te verseker dat voedselsekerheid, indiensneming en die vloei van goedere en dienste in die provinsie kan voortgaan.
Durbanhawe
Die gure weersomstandighede het ook ’n impak op Transnet se bedrywighede by Durbanhawe. Swaar reën het die paaie wat na die hawe lei, beskadig. Dit belemmer toegang tot die terminale.
Luidens ’n verklaring deur Transnet is bedrywighede by die hawe se terminale gister om 19:30 as voorsorgmaatreël opgeskort. Verskeping is ook tot verdere kennisgewing opgeskort.
Intussen is ’n multidissiplinêre bevelsentrum bestaande uit die Transnet-hawe-owerheid, operateurs en kliënte op die been gebring. Transnet se kliënte is versoek om vir eers nie vragmotors na die hawe te stuur nie om opeenhopings te vermy.
Terminale in Richardsbaai word op beperkte kapasiteit bedryf weens vloede. Luidens die verklaring sal Transnet Freight Rail se ingenieurspan die omvang van skade by dié terminale beoordeel voor dit weer op volle kapasiteit bedryf word.
“Die veiligheid van Transnet se personeel bly die grootste prioriteit. Alle belangrike veiligheidinspeksies sal onderneem word voor werksaamhede ten volle hervat sal word om te verseker dat toerusting en infrastruktuur veilig vir gebruik is.”
