Die La Niña-stelsel wat die somerseisoen oorheers het, gaan na verwagting ’n sterk impak op die winterreënseisoen hê. Mnr. Johan van den Berg, onafhanklike landbouweerkundige, sê die stelsel gaan na verwagting nog ’n paar maande ’n invloed uitoefen op weerstoestande aangesien atmosferiese toestande redelik gevestig is.
Volgens hom is die kans goed dat Suid-Afrika se natter weersiklus tot 2023 kan voortduur. “Hoewel die tydperk van Maart en Julie baie veranderlik is en voorspelbaarheid swak is, dui huidige voorspellings aan die kans is 85% dat weerstelsels die res van die jaar tot in 2023 tussen La Niña en neutraal gaan wees, met ’n kans van 15% op ’n El Niño-stelsel.”
’n La Niña-stelsel is tradisioneel goeie nuus is vir Suid-Afrika en Australië. Die twee lande lê op dieselfde breedtegraad en dus stem weerstelsels in Suid-Afrika en veral die oostelike dele van Australië ooreen. In Australië kan die nat toestande (wat reeds die seisoen voorgekom het) voortgesit word in veral die laatwinter en lente, wat beteken met die huidige goeie grondwatertoestande en reën op die regte tyd, gaan koringproduksietoestande daar baie gunstig wees.”
