Redelik baie reën is steeds moontlik tot ongeveer 23 Maart oor die sentrale tot oostelike dele van die somerreëngebied en vanaf ongeveer 28 Maart tot aan die einde van die eerste week van April wanneer dit weer weswaarts kan uitbrei, sê mnr. Johan van den Berg, onafhanklike landbouweerkundige.
Daarteenoor kan baie warm en droë toestande weer begin voorkom oor die sentrale tot westelike dele van die Wes-Kaap vanaf ongeveer 18 Maart tot einde Maart. Reën is egter moontlik oor die Suid-Kaap in die laaste week van Maart en eerste week van April met heelwat koeler toestande.
“Die kans is nie goed dat baie koue toestande en ryp gaan voorkom voor die eerste tot tweede week van April nie. Hoewel minimum temperature in die suidelike binneland vanaf 14 tot 16 Maart tot onder 10 °C kan daal, gaan die lugvog hoog genoeg wees dat ryp nie gaan voorkom nie.”
Draaipunt is naby
Met ’n sogenoemde natter siklus al sedert omtrent 2019 in sekere dele van Suid-Afrika is die draaipunt van die siklus nie meer op die verre horison nie, waarsku Van den Berg. Dit beteken nie dat die volgende somer droog gaan wees nie, maar hy glo die kans is baie goed dat die 2023-’24-seisoen ’n El Niño kan oplewer, wat ook die somerreëngebied gaan begin beïnvloed.
En die eerste streek wat dit gaan voel, is die Wes-Kaap.
“Dit is baie waarskynlik dat die Wes-Kaap waarskynlik ná die huidige La Niña-stelsels, wat in die volgende jaar of twee behoort te eindig, droër toestande gaan begin ervaar.”
Die goeie nuus is dat grondwatervlakke dan nog baie hoog gaan wees en damme oor die algemeen nog redelik vol, danksy die huidige El Niña se goeie neerslae. Die 2023-’24-seisoen het die potensiaal om ’n moeilike seisoen te word, waarsku Van den Berg. “Tesame met swakker opbrengste as gevolg van droogte, gaan baie duurder insetkoste groter druk op winsgewendheid in die landbou plaas. Dus moet die volgende jaar of twee gebruik word om strukturele aanpassings in produksiepraktyke te begin instel.”
