Toestande in die Indiese Oseaan het die afgelope twee maande die oorheersende invloed op die klimaat van Suid-Afrika uitgeoefen en dit het die effek van die verswakkende La Niña-stelsel oorheers. Die La Niña-stelsel het steeds ’n effek gehad, met vloedtoestande wat teen middel Februarie voorgekom het terwyl die siklone nog ver van die Afrika-kuslyn was.
“Die huidige La Niña-stelsel het sedert begin Februarie oorgaan in neutrale toestande. Die implikasie daarvan is dat daar steeds ’n kans is op reën oor die sentrale tot westelike dele van die land,” sê mnr. Johan van den Berg, onafhanklike landbouweerkundige.
Die gebiede waar reën kan voorkom, sluit in Noordwes, die Noord-Kaap, die suidwestelike dele van die Oos-Kaap, die westelike dele van die Vrystaat en die grootste deel van die Wes-Kaap. “Minder reën word oor die oostelike tot noordoostelike dele van die land verwag, dit wil sê Limpopo, Mpumalanga, KwaZulu-Natal, die oostelike dele van die Vrystaat, die hele Gauteng en die noordelike dele van die Oos-Kaap.
