Die provinsies wat na verwagting die meeste geraak sal word, sluit die oostelike gedeeltes van die Noord- en Oos-Kaap, die Vrystaat, Noordwes, Gauteng asook KwaZulu-Natal en die Hoëveld van Mpumalanga in.
Die weerdiens waarsku oor vloede plek-plek Vrydag wat waarskynlik die landbousektor, infrastruktuur en informele nedersettings in Noordwes, die noordelike gedeeltes van die Vrystaat en Gauteng kan ontwrig.
Saterdag kan vloede plek-plek in die oostelike gedeeltes van die Noord-Kaap, die noordelike en oostelike gedeeltes van die Oos-Kaap, die westelike gedeeltes van KwaZulu-Natal en die Hoëveld in Mpumalanga voorkom.
Reënerige toestande in die Noord-Kaap, die westelike gedeeltes van Noordwes asook die Vrystaat en noordwestelike gedeeltes van die Oos-Kaap sal volgens die weerdiens Sondag opklaar. Vloede kan egter Sondag plek-plek nog in die oostelike gedeeltes van Noordwes, die Vrystaat en die Oos-Kaap voortduur.
Die reën sal Vrydag met koue tot baie koue toestande oor die suidelike en suidoostelike binneland gepaardgaan wat Saterdag na die sentrale en oostelike binneland sal versprei. Ligte sneeuval kan vanaf Saterdagaand oor die oostelike en suidelike gedeeltes van Lesotho asook die omliggende Drakensberge verwag word.
Die weerdiens moedig die publiek aan om die oorkruis van riviere en vol strome te vermy, veral waar die water meer as enkel diep is. Daar moet ook na hoër grond beweeg word indien stygende vloedwater enigiemand se veiligheid bedreig.
