Volgens die Suid-Afrikaanse Weerdiens het Freddy gister omstreeks 19:30 die oostelike kus van Madagaskar bereik en is dit onderweg na die suide van Mosambiek en daarna die noordooste van Suid-Afrika.
Voordat dié betreklik kompakte storm land bereik het, is dit as ’n kategorie 2-sikloon geklassifiseer met winde van tot 150 km/h en rukwinde van tot 180 km/h. Volgens die weerdiens het Freddy as gevolg van rowwe terrein tot ’n laagdrukstelsel verswak.
Die RMSC La Réunion voorspel dat Freddy gedurende die volgende paar dae sal aanhou om in ’n wes-suidwestelike rigting te beweeg en teen vanaand sal versterk wanneer dit die Mosambiekkanaal inbeweeg.
Daar word verwag dat Freddy teen Donderdagaand weer tot ’n sikloon kan versterk terwyl dit na die suide van Mosambiek beweeg. Daar word voorspel dat Freddy Vilanculos teen Vrydagoggend sal bereik.
Die weerdiens waarsku dat Freddy waarskynlik die noordoostelike gedeeltes van Suid-Afrika van Saterdag 25 Februarie tot Maandag 27 Februarie sal beïnvloed, veral die Laeveld en platorand in Limpopo en Mpumalanga, aangesien die weerstelsel vir ’n paar dae langs die noordoostelike kus bykans sal stilstaan.
Swaar reënval van 200 mm en 400 mm wat tot wydverspreide vloede kan lei, word voorspel vir Vhembe en Mopani in Limpopo en tot ’n mindere mate Ehlanzeni in Mpumalanga. Aangesien noemenswaardige vloede reeds in die Laeveld en op die platorand voorgekom het, kan verdere vloede volgens die weerdiens katastrofies wees en langdurige gevolge inhou.
Hoewel minder reën oor die noordoostelike gedeeltes van Suid-Afrika verwag word, word inwoners van Capricorn in Limpopo, asook Umkhanyakude, Zululand en Amajuba in KwaZulu-Natal versoek om paraat te wees.
Benewens swaar reën word sterk wind van gemiddeld 45 km/h weens Freddy vanaf Vrydagaand in die noordoostelike gedeeltes van Suid-Afrika verwag.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
