Luidens ’n verklaring deur die weerdiens kan swaar reën en vloede vandag veral in die Oos-Kaap voorkom. Daar word gewaarsku dat KwaZulu-Natal en Mpumalanga ook aanhoudende reën kan ervaar.
’n Goed ontwikkelde bolug-trogstelsel, wat met koue en onstabiliteit gepaard gaan, versterk tans oor die suidwestelike gedeeltes van Suider-Afrika. Die weerdiens glo dat hierdie stelsel in die komende dae verder sal versterk en ’n afsny-laagdrukstelsel oor die suidelike en sentrale binneland sal vorm.
Terwyl die grootste deel van Suider-Afrika tans redelik droog is, word verwag dat hierdie stelsel van vandag tot die middel van die week welkome reën vir die oostelike provinsies sal bring. Hierdie stelsel sal na verwagting toenemend ooswaarts beweeg.
Bewolkte, koue en winderige weer sal volgens die weerdiens oor die Oos-Kaap, KwaZulu-Natal en Mpumalanga tot Woensdag voortduur. Reënval sal plek-plek voorkom, maar ligter as die reën wat vandag oor die Oos-Kaap verwag word. Die weerdiens maan inwoners van KwaZulu-Natal en Mpumalanga om hulself op drie dae van reën, swaar reën op sommige plekke, voor te berei.
Die weerdiens waarsku dat die aanhoudende reën tot gelokaliseerde vloede kan lei namate die grond versadig word en riviere en strome volloop.
Ligte sneeu kan oor van die hoër pieke in die Wes-Kaap en die oostelike gedeeltes van die hoër pieke in die Oos-Kaap verwag word. Namate die bolug-trogstelsel versterk, kan meer noemenswaardige sneeuval oor die oostelike gedeeltes van die Drakensberge en die hoër pieke in die Oos-Kaap, veral Barkly-Oos en Tiffendell, voorkom.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
