Die Suid-Afrikaanse Weerdiens het gister ’n geel vlak 2-waarskuwing uitgereik vir wind wat skade kan veroorsaak. Onstuimige seetoestande kan klein vaartuie tussen Kaappunt en Kaap Agulhas laat omslaan.
Die weerdiens waarsku ook dat ’n uiters hoë brandgevaar vandag in die munisipaliteite Khai-Ma, !Kheis, Kareeberg and Siyathemba in die Noord-Kaap verwag word.
Gauteng sal gedeeltelik bewolk en warm wees. In Mpumalanga sal dit gedeeltelik bewolk en warm tot baie warm wees met bewolkte toestande en enkele buie in die ooste van die provinsie gedurende die middag.
Gedeeltelik bewolkte en warm weer met enkele buie in die ooste van die provinsie word in Limpopo verwag.
Gedeeltelik bewolkte en warm weer word vir Noordwes voorspel met enkele buie en donderbuie wat oral behalwe in die ooste van die provinsie sal voorkom.
In die Vrystaat word gedeeltelik bewolkte en warm weer verwag met enkele buie en donderbuie oral behalwe in die verre noordooste van die provinsie.
In die Noord-Kaap sal dit gedeeltelik bewolk en warm wees met enkele buie en donderbuie in die ooste van die provinsie. Baie warm weer word in die noorde van die provinsie verwag.
Gedeeltelik bewolkte en warm weer word vir die Wes-Kaap voorspel met ligte reën vanoggend en vanaand langs die westelike dele van die provinsie se suidkus. Dit sal baie warm in die oostelike dele van die Sentraal-Karoo wees en koel oor die Kaapse Skiereiland.
Die weerdiens voorspel gedeeltelik bewolkte en warm weer met emkele buie en donderbuie die Oos-Kaap. In KwaZulu-Natal word gedeeltelik bewolkte en warm weer verwag met enkele buie en donderbuie in die suidweste en noordooste van die provinsie.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
