Luidens ’n mediaverklaring beloof dié ekspo ’n wêreldklas tentoonstelling van die Suid-Afrikaanse veebedryf, sowel as ’n uitstalling van die primêre vleis- en suiwel-sektore en hul waardekettings.
Op vanjaar se program sluit in ras- en interras-kampioenskappe, ’n streeksjeugskou, ’n vleisbees- en melkbokinligtingsdag, ’n Jong Afslaerskompetisie en ’n konferensie met die tema, Die Kragdebat: Afrika in Fokus. Die hoogtepunt van die geleentheid is die kroning van die Suiwel Koningin en die Rooivleis Koning of Koningin op Saterdag, 17 Oktober.
Die uitstalling trek internasionale aandag en het ’n trotse verwantskap met die Angus-ras, wat die grootste vleisbeesras in die wêreld is, maar ook die enigste in Suid-Afrika wie se handelsmerk vryelik in die mark beskikbaar is. Skoolgroepe wat vooraf registreer kry gratis toegang op Donderdag en Vrydag. ’n Omvattende skole-opvoedingsprogram is ontwikkel om leerders se kennis van dié interessante en dinamiese bedryf te verbreed.
AgriWorks Landbou-ekspo word gesamentlik met Agri-Expo Livestock aangebied. Die twee skoue komplimenteer mekaar en bied meer waarde aan produsente, uitstallers en besoekers, lui die verklaring.
Hekke open daagliks van 09:00 tot 18:00 elke dag. Kaartjies is by die hekke beskikbaar teen R30 vir volwassenes en R10 vir kinders van 7 tot 13 jaar. Kinders onder die ouderdom van 7 jaar kry gratis toegang.
Besoek www.livestock.org.za vir meer inligting of kontak Porchia Adams by 021-975 4440 of porchia@agriexpo.co.za. Skoolgroepe kan Claudine Wagner by 021-975 4440 of Claudine@agriexpo.co.za kontak.
