Goeie beplanning en noukeurige tydsberekening van verskillende verbouingsaksies kan vanjaar vir goeie kanola-opbrengste sorg.
“Gebrek aan deeglike beplanning kan vanjaar die risiko by kanola verhoog,” het mnr. Piet Lombard van die Wes-Kaapse departement van landbou gesê.
Dit is veral omdat die kultivar van baie boere se eerste keuse nie vanjaar altyd beskikbaar is nie en Clearfield- en triasienbestande kultivars dikwels deur konvensionele kultivars vervang gaan word.
Lombard het gesê dis dus belangrik dat boere lande se onkruidbestuursgeskiedenis ken. “Sulfonielureas kan baie skade veroorsaak aan kultivars wat nie weerstand daarteen het nie.”
Lombard het op Overberg Agri se voorplant-inligtingsdag op Rietpoel gesê daar is ’n verband tussen die plantdatum en opkoms van saailinge. “Die opbrengsverwagting neem met 1,5% tot 1,6% toe vir elke dag wat die saailinge vroeër opkom.”
Die vroegste planttyd vir die Overberg en Swartland is waarskynlik die laaste week van April. Tog wil dit voorkom of Swartlandse boere nog tot 9 Mei kan plant sonder dat opbrengs verlaag word. Vinnige tot mediumgroeiseisoenkultivars word meestal vir die Overberg en Swartland aanbeveel.
Reën en temperatuur in die tydperk nadat kanola begin blom, speel ook ’n groot rol, het Lombard gesê.
“Opbrengs verander met 1,55% vir elke 1 mm reën meer as 15 mm vir die 60 dae na aanvang van blom. Die opbrengs styg met 10% tot 13% vir elke 1 °C wat die gemiddelde temperatuur onder die gemiddelde temperatuur vir die blom- en peulvultydperk daal.”
Uiteindelik het die klimaat gedurende Augustus tot Oktober die grootste invloed op opbrengs. “ ’n Groot deel van kanola se opbrengspotensiaal word bepaal nádat ek reeds my laaste aksie uitgevoer het.”
