’n Opname deur me. Heleen Viljoen, junior ekonoom by Graan SA, toon dat die gemiddelde prys van Sakura, ’n onkruiddoder, R5 334,75/kg in die Wes-Kaap is, maar dat daar boere is wat R5 789,35/kg betaal. Daar is ook boere wat “net” R5 099/kg betaal (sien grafiek onder).
Viljoen het soortgelyke bevindinge by ureum gemaak. Die gemiddelde prys van ureum het in 2022 met 140% gestyg teenoor dié van 2021. Hoewel die wisselkoers en die tyd van aankope tot variasie in kunsmispryse lei, toon haar opname dat twee boere wat in April 2022 ureum gekoop het, onderskeidelik R12 750/t en R21 500/t betaal het. Dis ’n verskil van 69%.
Viljoen se jaarlikse opname vergelyk gemiddelde pryse van ’n streek, wat sy van individuele produsente in daardie streek kry, met gemiddelde pryse van omliggende streke.
Sy het bevind dat boere in ’n gebied wat strek van Vredenburg tot Eendekuil “keer op keer meer as die gemiddelde” van die Wes-Kaap betaal het.
“Die data wat ons insamel, is nie net vir Graan SA nie, dis ook ’n hulpmiddel vir boere. Wanneer inset-aankope plaasvind, kan boere sien wat pryse in gebiede om hulle is. ’n Mens begin ook neigings opmerk oor die jare.”
Mnr. Derek Mathews, voorsitter van Graan SA, het op Graan SA se streeksvergaderings in die Wes-Kaap gesê Viljoen se verslag is ’n stuk gereedskap vir boere. “Dit help jou om bedingingsmag te bewerkstellig.”
Mnr. Corné Louw, hoof van toegepaste ekonomie en lededienste by Graan SA, het boere aangemoedig om seker te maak dat afwaartse neigings in pryse by hulle op die plaas uitkom.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
