Een van dié vrae is waarom die gehalte van sy koringoes vanjaar van die beste nóg is.
Dít nadat sy plaas, Klipgat, buite Moorreesburg, een van die slegste reënseisoene die afgelope jaar gesien het.
Wanneer jy deesdae verby plase in die Swartland ry, sien jy gereeld stropers deur die geel koringlande ry besig om van vroegoggend tot sonsondergang te stroop.
“Ek is heeltemal verras, want die reënval was vanjaar ondergemiddeld. Hoewel die koringoes nie naastenby so goed soos die seëning is wat ons verlede jaar gekry het nie, is dit baie beter as wat ons verwag het ons gaan kry.”
Basson beskryf 2021 as 'n uitskieterjaar toe hy 4-5 t/ha gestroop het. Hy sê gemiddelde opbrengs is sowat 3,3 t/ha.
Vanjaar het hy 1,7-2,2 t/ha gestroop.
Hy sê nes ander boere het hy sy insetkoste so laag moontlik probeer hou deur nie te bemes soos vorige jare nie.
“Die oes is kleiner, maar wat ons nie voorsien het nie, is dat die koring se gehalte van die beste is wat ons nog gekry het - supergraad! Ons is baie dankbaar daarvoor.
“Ek weet nie hoe dit gebeur het nie, veral ná die afgelope reënseisoen. Al wat ek kan sê is die liewe Vader se hand is orals.”
@landbouweekblad Die video is geneem op Abri Richter se plaas Panorama in die Piketberg-distrik, Wes-Kaap, deur Linde Richter, sy seun. #landbouweekblad #koring #lbw #agriculture ? original sound - Landbouweekblad
Mnr. Abri Richter, wat op die plase Panorama en Langvlei tussen Piketberg en Eendekuil boer, sê sy koringoes is vanjaar “uitstekend” - ten spyte van ondergemiddelde reënval.
“Die gehalte van die oes is baie goed en ook baie meer as wat ons verwag het. Ek weet nie waaraan om dit toe te skryf behalwe as een van die wonders van die natuur.”
Richer sê dit is die tweede jaar dat hy koring plant. Hy pas wisselbou met lupiene toe.
Die prys van koring is ook vanjaar goed weens die oorlog tussen Rusland en Oekraïne.
Mnr. Dirk Lesch wat naby Riebeek-Kasteel op die plaas Elim boer, stroop tans kanola en gaan binnekort met koring begin. Hy het die afgelope seisoen slegs 220 mm reën aangeteken – die minste sedert 1959.
Hy sê die kanola het sleg begin omdat die saadjies heelwat kleiner is as vorige jare.
Maar ná sowat 2 mm reën vroeg in Oktober het die gehalte van die kanola effens verbeter. Hoewel hy nog nie met sekerheid kan sê wat sy koringoes gaan wees nie, wil dit vir hom lyk asof daar ook “ ’n wonderwerk” in die gehalte van sy oeste vanjaar gaan wees.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
