Mnre. Andrew Weidemann en Barry Large, albei koringprodusente, het waarskynlik Australiese geskiedenis gemaak toe hulle graanhandelaars as middelman uitgesny en self ’n besending koring direk na meulenaars in Oman uitgevoer het.
Weidemann, wat in Wes-Victoria boer, het aan die nuusdiens ABC Rural gesê eindgebruikers soos die Oman-meule wil graan direk van die boere koop. Normaalweg word graan aan grootmaathanteerders soos Graincorp of Viterra gelewer, wat dan die uitvoer behartig.
Hy en Large, wat ook in die weste van Australië boer, het ’n onderneming bekend as LW Investments Australia op die been gebring om hul eie graan, sowel as dié van ander boere, direk na eindgebruikers uit te voer. Die eerste vrag word nou in die hawe van Geelong gelaai en sal later vandeesweek na Oman vertrek.
Weidemann sê die Oman-meule voer al geruime tyd koring van Australië af in en het al aangedui dat hy regstreeks met boere wil skakel. “Boere stel ook belang om te weet wat van hul koring word. Tradisioneel laai die meeste boere hul graan by ’n grootmaathanteerder of plaaslike silo af en weet dan nie wat verder daarvan word nie.
“Nou kan ons die kopers van ons graan ontmoet en luister hoekom hulle ook eerder regstreeks met die produsente wil skakel as met ’n middelman. Daar was groot belangstelling onder boere om tot ons eerste skeepsvrag by te dra en ek verwag dat daar nog sal wees. Daar is al baie keer op byeenkomste van boere hieroor gepraat en die terugvoer wat ons kry, is verbasend.”
Hy sê internasionale skeepsvervoer behels ingewikkelde logistiek en dit was ’n hele leerkurwe buite hul normale boerderypraktyke om allerlei uitvoerkwessies te behartig, wat die algehele koste kon opjaag.
Hy wys ook daarop dat Australiese graanprodusente in onlangse jare miljoene dollar verloor het omdat graanaankopers bankrot gespeel het. Baie tyd is in onderhandelinge bestee om veilige betalings te verseker. “Om sake te doen soos ons wil, wil ons hê die geld moet vooruit betaal word om die graan by boere te kan koop. Ons betaal die boere binne vyf dae en in sommige gevalle vinniger as dit.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
