Die wêreld se graan- en oliesademarkte, insluitend Suid-Afrika s’n, hou fyn dop wat met naderende onderhandelinge sal gebeur wat die toekoms sal bepaal van die “humanitêre korridor” wat aan Oekraïne toegestaan is vir sy uitvoer van graan en ander voedsel via die Swartsee. Op 22 Julie 2022 het die Verenigde Nasies (VN) en Turkye ’n ooreenkoms met Rusland, wat Oekraïne op 24 Februarie 2022 binnegeval het, bemiddel om hierdie uitvoer wat vir baie ontwikkelende en ontwikkelde lande uiters belangrik is, toe te laat.
Die Swartsee-graaninisiatief is outomaties elke vier maande hernubaar, tensy een of meer van die betrokke belanghebbendes dit wil beëindig of wysig.
Die VN berig dat Oekraïne kon van Augustus 2022 tot middel Januarie 2023 altesaam 17,8 miljoen ton graan en ander voedsel deur die Swartsee uitvoer. Sedert vroeg vanjaar het die Oekraïense landbouraad egter begin kla dat Rusland na bewering die inspeksie van skepe wat hawens binnekom en verlaat om Oekraïense landbouprodukte te laai en uit te voer, doelbewus vertraag.
