’n Vergadering Dinsdag (17 Januarie), waar probeer is om konsensus te bereik oor voorgestelde veranderinge vir die gradering van mielies, het weer misluk en die regering gaan vir eers nie verder die voorgestelde veranderinge oorweeg nie.
Die vergadering tussen die departement van landbou, grondhervormng en landelike ontwikkeling en belanghebbendes in die mieliebedryf is belê nadat almal tot 28 November verlede jaar geleentheid gehad het om kommentaar te lewer en die insette geëvalueer is. Graan SA sê in ’n terugvoerverslag aan sy lede die Meulenaarskamer, die vereniging vir die vervaardiging van dierevoedsel en onafhanklike meulenaars het die voorstelle sterk teengestaan.
Die mielieforum het aanvanklik die aansoek ingedien nadat die hele bedryf aan die proses deelgeneem het, en soos almal gedink het, daar konsensus oor die voorgestelde wysigings was. Die voorgestelde wysigings is op 11 Augustus 2021 ingestuur vir die afkondigingsproses. Toe dit duidelik geword het dat dit nie voor die huidige bemarkingseisoen wat op 1 Mei 2022 begin het, afgehandel sou wees nie, is gevra vir ’n tydelike bedeling om die oes daarvolgens te gradeer.
