“Die grondboonplantjies wat sover geplant is en opgekom het, se gehalte ten opsigte van groeitempo en gesondheid lyk beslis beter as verlede jaar dié tyd,” sê mnr. Eduard Dreyer, grondboonboer en mede-eienaar van Vienna Ground Nuts, ’n verwerkingsaanleg tussen Bothaville en Kroonstad in die Vrystaat.
Mnr. Lourens de Kock, grondboontjieboer van Noordwes wat ook ’n verwerkingsaanleg, Roba Foods, bestuur, stem saam. Hy sê twee faktore speel veral ’n rol. “Ons het tot dusver meer hitte-eenhede gehad as dié tyd verlede jaar. Tóé was dit oorwegend koel en daar was nie eintlik baie warm dae tussenin nie.”
Voorts het baie boere vanjaar saad teen aalwurms behandel toe daar geplant is, volgens Dreyer, De Kock en ander produsente met wie Landbouweekblad gepraat het. Een van die redes waarom die 2021-’22-seisoen swakker was as verwag, was ’n toename in aalwurms, veral vanweë baie vog en hoër as normale watertafels. Dit het plante geknou.
