Nagmuise is ’n voortslepende probleem wat veral met die aanbreek van planttyd kop uitsteek, vertel mnr. Gideon Melck, van die plaas Waterboerskraal by Hopefield, waar die Wes-Kaapse Sandveld begin. Gedurende die somer moet boere dus die nodige planne beraam om dié probleem te bekamp.
Ná planttyd word bekampingsmaatreëls weer toegepas om te probeer voorkom dat die nagmuise begin aanteel. Na gelang van die grootte van die plaas kan die bekamping van nagmuise ’n boer van R100 000 tot R140 000 aan arbeid en chemikalieë kos. Indien nagmuise nie bekamp word nie, kan hulle volgens Melck skade van tot R250 000 veroorsaak wanneer hulle jong saailinge uitgrawe en vreet.
Mnr. Corné Louw, hoof van toegepaste ekonomie en lededienste by Graan SA, sê nagmuise was gedurende November en Desember verlede jaar ’n probleem in veral die omgewing van Bothaville en Wesselsbron in die Vrystaat, asook in Mpumalanga. Hy sê hulle het reeds klagtes van boere in die Wes-Kaap ontvang wat sukkel om nagmuise te bekamp.
“Saad is verskriklik duur en elke plant wat oorgeplant moet word, is agter skedule. Dit gaan dus nie net oor die koste van die saad oorplant nie. Na gelang van hoe groot die area is wat oorgeplant moet word, sal die boer moontlik ’n planter moet inspan. Dit beteken daar is ’n bykomende brandstofkoste. Dan het ’n mens nog nie eens gepraat oor die moontlike verlies aan opbrengs en die koste om die nagmuise te bekamp nie.”
Louw raai boere aan om dr. Gerhard Verdoorn, bedryfsbestuurder van CropLife SA, se omvattende gids oor die bestuur van nagmuise te volg ten einde die nodige voorsorgmaatreëls toe te pas en finansiële verliese te vermy. Die gids verduidelik hoe ’n breër benadering, soos die inspan van uile, gevolg kan word om nagmuise te bekamp.
Volgens hom moet boere ook met strooptyd aandag aan die bekamping van nagmuise gee. “Dit is beslis ’n geval van voorsorg is beter as nasorg.”
Die gids is hier beskikbaar.
