Die saadmaatskappy Delta Saad is deur mnre. George Barnard, ’n produsent van Groblersdal, en Pieter Rademeyer, voormalige hooflandboukundige van die saadmaatskappy Pannar, oorgeneem nadat mnr. Braam Bezuidenhout, eienaar van Delta Saad, besluit het om homself op die kunsmisbedryf toe te spits.
Delta Saad is sedert 2000 in die plaaslike saadbedryf betrokke en is naby Lichtenburg in Noordwes gesetel, waar sy proefplaas en saadverwerkingsaanleg gevestig is. Die maatskappy konsentreer hoofsaaklik op die produksie van droogte- en hitteverdraagsame mieliebasters, wat ook voldoende weerstand bied teen die vernaamste blaar- en stamsiektes, asook kopvrot. Die maatskappy lewer wit en geelmieliebasters, kuilvoermieliebasters en akkerbone. Die maatskappy produseer uitsluitlik nie-GM kultivars.
Rademeyer sê in ’n verklaring dat die nuwe eienaars daarna uitsien om Delta Saad tot nuwe hoogtes te lei, terwyl boere kan uitsien na opwindende nuwe mieliesaad met toepaslike landboukundige eienskappe vir hul besondere omstandighede, gepaard met landboukundige ondersteuning om wenoeste te verseker.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
