Graan SA verwag dat landbouchemikalieë vir koring en kanola, soos onkruid-, insek- en swamdoders, vanjaar met 25% kan styg vergeleke met verlede jaar.
Me. Heleen Viljoen, junior ekonoom by Graan SA, het op die organisasie se streekvergaderings in die Wes-Kaap gesê koringsaad se prys gaan met 15% styg, maar kunsmis- en brandstofpryse kan onderskeidelik met 6% en 11% daal.
Saad, kunsmis, brandstof, herstelwerk en onderhoud, en plaagdoders maak sowat 75% van die totale veranderlike koste by koring uit. Kunsmiskoste is bykans die helfte daarvan en plaagdoders 25%.
As al die stygings en dalings in ag geneem word, word voorspel dat die deel van die veranderlike koste by koring met 3,18% sal toeneem en by kanola met 3,92%.
By kanola maak saadkoste (R1 825,20/ha) net meer as 18% van die veranderlike koste uit, kunsmis 42% en plaagdoders 23%.
‘Ketting kan korter wees’
Mnr. Derek Mathews, voorsitter van Graan SA, het gesê boere moenie net na die totale styging van net oor 3% kyk en gemaklik raak nie. “Ons gaan volhard om die kollig op hoë pryse en groot prysstygings te rig. Die tipe data is die gereedskap. Dít is die klein goedjies wat ons konstant gaan doen om seker te maak dat ons winsgewendheid kan uitbou.”
Graan SA se standpunt is dat daar binne die graanwaardeketting nie onregmatige winste op enige punt bekostig kan word nie.
Mathews hoop ook dat boere ’n punt kan bereik dat hulle produkte regstreeks by die vervaardigers van plaagdoders kan koop nadat ’n kundige ’n aktiewe bestanddeel aanbeveel het. “Dit kan daardie ketting soveel korter maak.”
Mnr. Corné Louw, hoof van toegepaste ekonomie en lededienste by Graan SA, sê Graan SA monitor plaaslike en internasionale insetpryse deurlopend om deursigtigheid in die mark te bring.
“Hou die prysneigings dop as julle kwotasies kry. KAN is byvoorbeeld 5,5% goedkoper as verlede Januarie, ureum is 29% goedkoper en MAP 12%. Dis wat internasionaal aan’t gebeur is.
“Dis veral die stikstofpryse wat besig is om te daal. Maak seker die afwaartse neiging kom by jou op die plaas uit.”Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
