Mnr. Jacobus Human van Eerstebos Boerdery by Heidelberg sê hulle is al van 10 April af volstoom besig om kanola, gars en koring te plant. Hulle het voor die Paasnaweek 15 mm tot 20 mm reën op party plekke gekry.
Hy sê toestande is eintlik gunstig. “Die grond werk baie mooi. Die vogtoestande is goed.”
Hulle het in Januarie en Februarie nie veel reën gehad nie, maar in Maart ’n paar keer 10 mm en minder gekry.
In die Swartland het enkele boere reeds dekgewasse geplant. Mnr. Johan Hanekom van Kraalbosvlei by Moorreesburg sê hy is besig om die grond vir kanola voor te berei. Hulle het twee weke gelede reën gekry, maar dis nou weer droog.
Hy begin op ’n spesifieke datum te plant, en sê al is die grond weer droog, is dit nie so hard soos ander jare nie. “Dis net vreeslik stowwerig. Van 20 Mei af word reën vir ons voorspel, maar dan behoort ons klaar geplant te wees.”
