Die Amerikaanse mieliekoning mnr. David Hula het in 2019 nogmaals die rekordboeke herskryf toe hy sy vorige rekord met bykans 5 ton per hektaar verbeter het om ’n allemintige 38,679 t/ha te oes.
Hula, ’n graanboer van die deelstaat Virginia, het die vierde keer die wêreldrekord vir mielie-opbrengs verbeter in die nasionale mieliekwekersvereniging se jaarlikse opbrengskompetisie, boonop op sandleemgrond. Dit is die vyfde keer sedert 2012 dat hy die eerste plek in dié stryd behaal.
Hula het aan die landboupublikasie Successful Farming gesê daar is geen kortpad vir sy prestasie nie en dat dit baie aandag aan detail, nadenke en oplossings verg. Hy toets verskeie praktyke in proewe en leer voortdurend. “Dit wat werk, word op ander grond toegepas, en wanneer dit werk, word dit standaardpraktyk.” Hy roteer mielies, kleingrane (soos koring, gars en hawer) en plant ’n vangoes van sojabone ná die kleingraanoes in ’n wisselboustelsel.
