Mnr. Randy Dowdy van Brooks County in die Amerikaanse deelstaat Georgia, het vanjaar sy sojaboonwêreldrekord van 10,734 t/ha, wat hy in 2016 opgestel het, verbeter. Die nuwe rekord is 11,941 t/ha op ’n land van 1,3 ha, en 11,236 t/ha op ’n land van 1,7 ha. Die Amerikaanse webwerf agweb.com berig Dowdy het twee sojaboonkultivars, AgriGold G5000 en Hefty 49X7S, aangeplant om die besonderse prestasie te behaal.
Dowdy skryf die hoë opbrengs onder meer toe aan optimale sonlig, bestuur en grondgesondheid. Hy glo boonop dat daar nog groter opbrengste wag.
Die kultivar AgriGold G5000 is op 20 Maart in sanderige leemgrond teen ’n plantestand van 125 000/ha aangeplant. Dit is opgevolg met Hefty 49X7S op 10 April teen ’n plantestand van 130 000/ha. “Die groot verskil wat gewone sojaboonopbrengste van uitstekende opbrengste onderskei, is die gehalte van die saadbehandeling wat die saad vroeg ontvang,” sê hy.
Om gelyke opkoms te verseker is die sojabone deurlopend besproei weens ’n droogte van ses weke en hittestres. Dowdy het ’n bespuitingsprogram gevolg om onkruide te bestry en insekplae te voorkom, terwyl blaarvoedings en biologiese produkte gebruik is om groei te bevorder.
Dowdy het benadruk dat die weer ook nie buite rekening gelaat kan word nie. “Droogte het sojabone en mielies op droëland beskadig, maar terselfdertyd het die oorvloed sonlig ook die weg gebaan vir massiewe opbrengste op besproeiingsgrond. Dit was uiteindelik goeie weer, selfs al was dit tot nadeel van die aanplantings op droëland.”
