Die afgelope paar weke was daar heelwat meer sonskyn en droër dae in die somerreëngebied wat baie gunstig was vir mielie-, sojaboon- en sonneblomaanplantings wat reeds in die grond is.
Dr. Werner Rossouw, direkteur van Silostrat, wat in groot dele van die somersaaigebied betrokke is, sê die warmer weer het gehelp dat gewasse baie mooi herstel het ná die baie reën in November en Desember. “Oor die grootste gedeelte van die aanplantingsgebied vertoon die gewasse baie goed. Dit is egter ook so dat daar gedeeltes in die Oos-Vrystaat en Mpumalanga is waar mielie-aanplantings weens nat grond nie voltooi kon word nie.
“Daarom verwag ons dat die eerste oppervlakteskatting later vandeesmaand effens laer kan wees as die aanvanklik voornemens om te plant. Die opppervlakte onder mielies kan effens laer wees as wat die voorneme was, maar daarmee saam kan die sojaboonaanplantings weer effens meer wees en daar kan ook ’n styging in sonneblomaanplantings wees.”
