Terwyl die klem nou begin verskuif na die nuwe plantseisoen het die nasionale oesskattingskomitee (NOK) in sy agtste produksieskatting die kommersiële mielie-oes nou op 15,26 miljoen ton geraam en die rekordsojaboonoes met 29 000 ton opgestoot na 2,20 miljoen ton.
Sowat 13,48 miljoen ton mielies is reeds aan silo’s gelewer en 2,13 miljoen ton sojabone.
Hoewel die geskatte mielie-oes 6% kleiner as verlede jaar se oes is, is dit steeds steeds heelwat hoër as die tienjaargemiddelde van 12,8 miljoen ton.
Somergraan-produksieskattings wat verhoog is in die nuutste skattings is as volg:
- Witmielies: 7,79 miljoen ton, 152 700 ton (2%) meer as die vorige skatting, met ’n opbrengs van 4,95 t/ha.
- Geelmielies: 7,47 miljoen ton, 103 000 ton (1,4%) meer as die vorige skatting, met ’n opbrengs van 7,13 t/ha.
- Nie-kommersiële mielies: 667 000 ton, 30 560 ton (4,8%) meer as die vorige seisoen.
- Sojabone: 2,2 miljoen ton, 28 900 ton (1,3%) meer as die vorige skatting, met ’n opbrengs van 2,38 t/ha.
In teenstelling hiermee is die skatting vir sonneblomsaad vir die vierde opeenvolgende maand verlaag. Die raming staan nou op 845 550 ton, wat 3,5% minder is as die vorige skatting. Die verwagte opbrengs is 1,26 t/ha.
Wintergewasse
In sy tweede produksieskatting van wintergewasse raam die NOK die koringoes op 2,22 miljoen ton, wat 39 840 ton (1,83%) meer is as die vorige skatting. Mnr. Christo van der Rheede, uitvoerende direkteur van Agri SA, glo die verwagte koringoes is goeie nuus aangesien dit bo die historiese vyfjaargemiddelde van sowat 1,87 miljoen ton is.
“Die grootste probleem wat boere tans in die gesig staar, is beurtkrag. Die voortdurende kragonderbrekings het ’n direkte impak op die gehalte van veral besproeiingsgewasse.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
