Barloworld Agriculture, wat Massey Ferguson- en Challenger-toerusting in Suid-Afrika versprei, en die Duitse BayWa, een van die toplandboumaatskappye ter wêreld, begin vanaf 1 Maart 'n gesamentlike onderneming genaamd BHBW, na die nodige goedkeuring van die mededingskommissie ontvang is.
Beide maatskappye het 'n belang van 50% in BHBW, wat die krag van twee bekende handelsmerke in landboumeganisasie kombineer.
Mnr. Godfried Heydenrych, voorheen uitvoerende hoof van Barloworld Agriculture, is aangestel as uitvoerende hoof van BHBW.
"BayWa is een van die grootste landboumaatskappye ter wêreld en die wêreld se grootste verspreider van AGCO-produkte," sê Heydenrych in 'n verklaring.
Oplossings vir boere
"Ons sien uit daarna om ons aanbod aan die plaaslike landbouwaardeketting te versterk met oplossings wat boere se produktiwiteit, volhoubaarheid en winsgewendheid bevorder.
"BHBW sal gedurende die volgende 12 maande bykomende produkte en oplossings op die gebied van meganisasietoerusting, digitale boerdery en agronomie bekend stel."
BHBW sal sake doen vanaf die Barloworld-perseel in Boksburg, Gauteng. Die bestaande Massey Ferguson en Challenger-handelaarsnetwerk sal steeds gebruik word.
Dié onderneming is nie Barloworld en BayWa se eerste vennootskap nie. Die maatskappye het 'n soortgelyke vennootskap in Zambië gesluit.
