Boere weet dat suur grond swak opbrengste kan veroorsaak. Namate aluminium en ander toksiese metale in suur grond opbou, word die ontwikkeling van plante se wortels, grondmikrobes en die beskikbaarheid van noodsaaklike voedingstowwe, soos fosfaat, benadeel. Gelukkig kan suur grond met kalk reggestel word.
Volgens mnr. Dawie du Toit, junior landboukundige van ZZ2 by Ceres, wat onlangs die graad MSc in grondkunde aan die Universiteit Stellenbosch (US) verwerf het, is die belangrikste faktore vir boere hoe doeltreffend ’n kalkproduk is om grondsuurheid te verhoog, of dit maklik toegedien kan word en wat dit kos.
“Die toediening van klas A-kalk is bes moontlik die doeltreffendste en ekonomiesste manier om grondsuurheid reg te stel, eerder as dat mikrofyn of verkorrelde kalk gebruik word.”
