Een daarvan is die vervoer van aanteelslakke van verskaffers na produksieplase, en van slakoeste van plase na verwerkingsaanlegte. Slakke moet vervoer word as hulle in ’n aktiewe fase is pleks van tydens estivasie (somerslaap).
Benewens dat konvensionele koerierdienste swak toegerus is, is dit ook onwettig om laasgenoemde vir dié doel te gebruik. Om hierdie probleme te oorkom, het The Snail House in Gauteng ’n gespesialiseerde, wettige, veilige slakvervoerdiens, Snail Transport, bekend gestel vir die vervoer – nasionaal en buite landsgrense – van aanteelslakke en oeste.
Dié diens kan ook slakeiers en bederfbare produkte vir of van slakproduksie en -verwerking vervoer. Kliënte kan ’n standaarddiens of ’n gespesialiseerde diens versoek. Kostedoeltreffendheid en die kortste vervoertyd moontlik word voorop gestel.
