Tussen die twee Oos-Kaapse dorpe Indwe en Elliot sien ’n mens ’n klomp swart-en-wit naamborde waarop “Ida Farms” geskryf staan. Vir Ida gaan jy waarskynlik nie sien nie. Dié klein nedersetting langs die R56 het basies net ’n polisiestasie en kerk.
Maar om Ida is grootskeepse boerderybedrywighede aan die gang wat nou nuwe lewe in die omgewing blaas. Daardie naamborde en al die plase waarop hulle staan, is deel van mnr. David Osborne se nuutste uitbreidings op sy reeds verstommende landboubedrywe wat op verskeie plekke in die land en selfs Namibië plaasvind.
Die grootste hiervan is Number Two Piggeries, wat sowat 30% van Suid-Afrika se varkvleis produseer. Dan is daar ook melkplase, Just Milk, en beesboerderye wat alles hand aan hand loop. Dit is presies wat op die Ida-plase gebeur. Hier is twee groot melkerye, ’n beesboerdery en die splinternuwe varkboerdery wat in September geopen is.
