’n Nuttige gids en gepaardgaande e-telkaart is die nuutste toevoeging tot die heuningbosbedryf se gereedskapkis. Dit sal dié bedryf help om die nuwe gehaltegraderingstelsel vir gefermenteerde heuningbostee toe te pas.
Die gids, getiteld “Grading of fermented honeybush tea, an illustrated guide”, is ’n eerste in sy soort en is aan die begin van die jaar bekend gestel. Dit is geskryf deur navorsers by die Landbounavorsingsraad en Universiteit Stellenbosch (US).
Dit bevat raad oor hoe mense wat by gehaltebeheer, produkontwikkeling en bemarking betrokke is, die gehaltegraderingstelsel optimaal kan gebruik, asook gereedskap vir die evaluering en bemarking van heuningbostee vir plaaslike en wêreldwye verspreiding.
Dié gereedskap sluit in sensoriese gereedskap soos ’n doelgemaakte telkaart en kleurverwysingskaart vir gehaltegradering. Dit bevat ook ’n aromaleksikon en chemiese verwysingstandaarde vir die opleiding van belanghebbendes in die bedryf oor die basiese sensoriese eienskappe van heuningbostee. Hierdie gereedskap is die produk van navorsing wat deel gevorm het van die navorsing vir die doktorsgraad wat dr. Brigitte du Preez aan die US verwerf het.
Twee studente wat wiskundige wetenskappe aan die US studeer, mnre. Heinrich Kreuser en Justin de Witt, het sedertdien ’n toepassing vir die e-telkaart ontwikkel wat op rekenaars gebruik kan word. Dit stel gebruikers van die toepassing in staat om aftreksels van heuningbostee ten opsigte van kleur, aroma en smaakeienskappe te gradeer. Die resultate en toegekende gradering kan onmiddellik in PDF-formaat of as ’n Excel-ontledingstaat versprei word.
