’n Nuwe grondobservatorium gaan in die Amerikaanse deelstaat Idaho gebou word om te toets hoe opgebergde koolstof in die aarde se “vergete ondergrond” op klimaatsverandering reageer.
Die nasionale wetenskapstigting van Amerika ondersteun die aanleg, die Deep Soil Ecotron, met $19 miljoen (sowat R292 miljoen). Daardeur sal dit makliker wees om dieper grond te bestudeer, skryf Erik Stokstad in ’n uitgawe van Science.
Volgens Stokstad gaan daarmee vasgestel word hoe diep grond dalk koolstof vrystel en daardeur klimaatsverandering aanjaag. Die navorsers wil ook vasstel wat die wisselwerking tussen grondmikrobes en plante is, en hoe stortreën in die somer en bevrore grond in die winter die ontstaan en groei van grond beïnvloed.
