In drie samelopende sake het die minister van water en sanitasie swaarde gekruis met verskeie partye (wat boerderye ingesluit het) oor die kwessie of die houers van watergebruiksregte enersyds daarop geregtig is om sodanige regte oor te dra aan ’n ander, en andersyds of hulle daarop geregtig is om in ruil vir sodanige oordrag ’n ooreengekome vergoeding te ontvang.
Die departement van water en sanitasie het in 1998 met die inwerkingtreding van die Nasionale Waterwet (Wet 36 van 1998) bepaal dat daar handel gedryf mag word in watergebruiksregte.
Van 1998 tot 19 Januarie 2018 het die departement handel in watergebruiksregte toegelaat en meegewerk tot die oordrag van die regte voorspruitend uit verhandelingsooreenkomste.
