Die Melkprodusente-organisasie (MPO) sê in ’n ontleding van onlangse in- en uitvoer van suiwelprodukte dit sal onsekerheid oor voorraadvlakke op die mark verhoog.
Melkverwerkers, wat gewoonlik suiwelprodukte aan die kleinhandel verskaf, sal nie van sulke invoer, die hoeveelhede en die tydsberekening daarvan weet nie.
Die MPO beplan om dié saak in sy kwartaallikse telefoonkonferensies met kleinhandelaars aan te roer en te wys op die risiko’s wat dit ten opsigte van markbestendigheid en verkeerde prysseine meebring.
Luidens die ontleding was Suid-Afrika in Januarie ’n netto invoerder van suiwelprodukte op grond van groot hoeveelhede afgeroomde melkpoeier en kaas wat ingevoer is.
Die MPO sê die internasionale prys vir afgeroomde melkpoeier is op ’n lae vlak, wat invoer aanmoedig.
In melkekwivalent (die hoeveelheid melk wat na raming gebruik word om ’n produk te maak) is 43 miljoen liter se suiwelprodukte in Januarie ingevoer, teenoor 30,2 miljoen liter wat uitgevoer is.
Die ingevoerde produkte het bestaan uit 18 miljoen liter afgeroomde melkpoeier, 17 miljoen liter kaas en wrongel, asook 4,3 miljoen liter langlewemelk.
Uitvoer het bestaan uit 8 miljoen liter afgeroomde melkpoeier, 7,5 miljoen liter kaas en wrongel, asook 6,6 miljoen liter langlewemelk.
Verlede jaar is daar in totaal 41 miljoen liter langlewemelk teen ’n gemiddelde vry-aan-boordprys van R7,64/liter ingevoer.
In Januarie was die gemiddelde vry-aan-boordprys vir ingevoerde langlewemelk R7,80/liter, vir afgeroomde melkpoeier R26,79/liter, vir cheddar R53/kg en vir gouda R65/kg.
Die belangrikste lande wat suiwelprodukte na Suid-Afrika uitvoer, is Pole (langlewemelk en cheddar), Denemarke (kondensmelk), Ierland en België (botter), Brittanje (cheddar) en Nederland (gouda).
Agri Inspec het met ’n spesiale projek begin om seker te maak ingevoerde produkte se etikette is korrek wanneer dit op kleinhandelsvlak verkoop word.
