Die herfskommandowurm (Spodoptera frugiperda) is endemies aan die tropiese en subtropiese dele van Noord- en Suid-Amerika. Bevolkings kan heel jaar oorleef van La Pampa in Argentinië in die suide tot Suid-Texas en Florida in die noorde. Seisoenale migrasie tot so ver noord as Ontario en Quebec in Kanada kan boonop plaasvind.
Die larfies kan op meer as 186 plantspesies van 42 plantfamilies voed, maar is veral lief vir grasgewasse, soos mielies, rys, sorghum en suikerriet. Larfies kan ook groot skade aan sojabone, bone en katoen veroorsaak. Opbrengsverliese op mielies van tót 40% in Honduras en 72% in Argentinië is al aangemeld (http://dx.doi.org/10.3897/neobiota.40.28165).
Die wetenskaplike naam van dié plaag beteken “vaal vlerke wat vrugte vernietig” en verwys na die kleur van die mot of volwassene, en die larfie wat op ’n wye spektrum vrugte vreet. Spodos is Grieks vir “hout-as”, en -ptera verwys na vlerke. Fructus verwys na vrugte in Latyn, en die woord perdita beteken “verlore” of “vernietig”. Spodoptera beskryf dus die volwassene en frugiperda die gedrag van die larfie.
