Sowat 500 gaste het die naweek die toekenningsgeleentheid by Grand West in Kaapstad bygewoon.
Die kompetisie word al 185 jaar lank aangebied. Dit was die eerste keer in die kompetisie se geskiedenis wat dieselfde produk van dieselfde vervaardiger weer as wenner aangewys is. Dié kaas word spesifiek vir Woolworths gelewer.
Altesaam 945 suiwelprodukte is vanjaar deur 83 produsente ingeskryf. Nie minder nie as 84 beoordelaars, waaronder voedseltegnoloë, kaashandelaars, kosskrywers en bekende sjefs, het die honderde produkte geproe.
Slegs 18 van die produkte is met die Qualité-gehaltemerk vereer, terwyl 105 produkte as Suid-Afrikaanse Kampioene aangewys is. Parmalat het altesaam sewe Qualité-toekennings ontvang en die Belnori-boetiekkaasmakery vier.
Byna perfek
“Tegnies en gastronomies is Parmalat se 10 maande oue Mature Gouda so byna perfek as wat ’n voedselproduk kan wees,” sê mnr. Kobus Mulder, hoofbeoordelaar en internasionale suiwelkundige.
“Vir ’n produk om in ’n kompetisie van hierdie omvang gekies te word as Suiwelproduk van die Jaar, is ’n lang en moeilike pad en elke suiweltegnoloog se droom. Dat hierdie eer vanjaar se wenner van die gesogte titel vir die tweede jaar opeenvolgend te beurt val, is uitsonderlik,” sê Mulder.
Die kompetisie het vanjaar gegroei tot tien kategorieë met meer as 100 klasse vir eindprodukte in die bedryf se prosesseringslyn. Mnr Johan Ehlers, hoof- uitvoerende beampte van Agri-Expo, sê die toename in inskrywings benadruk die belangrikheid van hierdie kompetisie vir individue, klein en mediumgroot ondernemings, asook nasionale én internasionale maatskappye.
Vyftien produsente het ook vanjaar vir die eerste keer vir die kompetisie ingeskryf.
Liefhebbers van suiwelprodukte kan talle van hierdie topgehalte suiwelprodukte van Vrydag 27 tot Sondag 29 April by die Suid-Afrikaanse Kaasfees op Sandringham buite Stellenbosch proe. Besoek www.cheesefestival.co.za vir meer inligting.
