'n Knap middelvlak-bestuurder van Riviersonderend, mnr. Marthinus Farao van die SAPO Trust, Riviersonderend, het by die Agri Mega Week, Bredasdorp weggestap met die titel 2013 Overberg Plaaswerker van die Jaar titel.
Farao is uit 20 kategorie-finaliste aangewys om die Overberg in Oktober vanjaar by die Wes-Kaapse Departement van Landbou en van Landelike Ontwikkeling en Shoprite se Plaaswerker van die Jaar gala-aand te verteenwoordig. Pryse ter waarde van meer as R100 000 wag by die geleentheid op die algehele wenner.
Farao is as middelbestuurder werksaam by die SAPO Trust op Riviersonderend en reeds die afgelope 25 jaar, as 'n plantkundige, betrokke in die landbou. Sy bestuurder is mnr. Adam Mouton van SAPO. Die Plantverbetering Instituut het hierdie Riviersonderend-tak op die Tygerhoek-plaas gevestig. Die 35 ha plaas word tans steeds van die Wes-Kaapse departement van landbou gehuur.
Beste potensiaal
Die spesiale HopkinsCalvert-prys vir uitstaande prestasie is aan nóg 'n Riversonderender toegeken. Dié eer het mnr. Ivan Mtotsana van Grootvlakte te beurt geval. Renaldo Davids is aangewys as die kategoriewenner met die beste potensiaal.
Die geleentheidspreker, Claude Möller, het finaliste die versekering gegee dat Suid-Afrika se plaaswerkers nie onsigbaar is nie, al is daar nie altyd sigbare erkenning vir hul harde werk nie. “Ons sien julle en God sien julle en jul harde werk. Moenie verlslaaf raak aan erkenning nie, want die onsigbare werker se erkenning kom op ‘n ander manier,” meen hy.
Me. Joyene Isaacs, hoof van die Department van Landbou en Landelike Ontwikkeling in die Wes-Kaap, het die finaliste, wat elkeen in eie reg 'n wenner is, aangemoedig om hul kinders uit te daag om na die topposte in die Llndbou te streef en daarvoor te werk om dit oor ‘n paar jaar te beklee.
Mnr. Orton King, groep uitvoerende direkteur van die Agri Mega Groep het die nasionale regering uitgedaag om ook, soos die Wes-Kaap, jaarliks ‘n Plaaswerker van die Jaar-kompetisie aan te bied.
* Algemene Werker – Hendrik Lakay (Môrelig, Bredasdorp); Martin Julies (Boontjieskraal, Caledon) en Jason Diedericks, Warmoeskraal, Caledon).
* Diereproduksie – Gavin Jaars (Hansieskloof, Napier); Willem Foster (Boontjieskraal, Caledon) en Rolan Mauritz (Warmoeskraal, Caledon).
* Tegniese Operateur – Francois Hansen (Diepgat, Caledon); Flip Hendricks (SAPO Trust, Riviersonderend) en Daniel Pieters (Hansieskloof, Napier).
* Trekkerbestuurder – Dawie Tobias (Driefontein, Caledon); André Jacobs (Schietpad, Napier) en Leon Jumat,(Warmoeskraal, Caledon).
* Administratiewe Personeel – Daniëlle May (SAPO Trust, Riviersonderend) en Renaldo Davids (Hansieskloof, Napier).
* Junior Bestuur - Randell Ellis (Cordale Plase, Caledon); German Hendricks (Langhoogte, Caledon) en Johannes August (Floraland, Bredasdorp).
* Middelbestuur – Marthinus Farao (SAPO Trust, Riviersonderend); Ivan Mtotsana (Grootvlakte, Riviersonderend) en Chaline Dramat (Remhoogte, Caledon).
