Transnet Freight Rail het einde November aangekondig dat Traxtion Sheltam die eerste vlak van die evalueringsproses voltooi het om spoorvrag op sy Kaapse korridorroete te kan vervoer.
Traxtion is die grootste onafhanklike spoorwegmaatskappy in Afrika.
Transnet wil, as deel van sy hervormingsprogram, derdeparty-operateurs toegang gee tot dele van die netwerk.
Volgens Engineering News sal die spoorwegmaatskappy drie maal per week sy treine op die roete tussen Kroonstad en Oos-Londen kan gebruik. Daar word verwag dat hy hoofsaaklik landbouvrag sal vervoer.
Dit volg nadat Transnet 16 gebruiksgleuwe vir sy Kaapse vragskiphouerkorridors te koop aangebied het, met Traxtion wat die enigste maatskappy is wat suksesvol was met sy aanbod.
Die maatskappy het dus die eerste stadium van die evaluasieproses voltooi, en moet nou die res van die aansoekproses voltooi om seker te maak hy is bedryfsgereed en voldoen aan die spoorveiligheidreguleerder se vereistes.
Die TFR laat reeds geruime tyd derdeparty-operateurs in die passasiers- en toerismebedryf toe, maar dit is die eerste keer dat ’n private maatskappy vrag op Transnet se hooflyne sal kan vervoer.
Die Oos-Londenhawe is vanjaar vir die eerste keer sedert 2012 heropen vir graanuitvoer danksy samewerking tussen Sacota, sy lede en die Transnet-haweterminale.
Dit is gedoen om toegang tot ’n bykomende uitvoerhawe te kry weens beperkte kapasiteit by die Durban-hawe.
