Ek het my boerdery binne die beperkings van Nardouwsberg se klimaat en water ontwikkel. Dit gaan dalk stadig, maar hier moet ’n boer groei en ontwikkel soos wat sy inkomste toelaat. Ek maak planne wat hier werk en boer vir die omstandighede hier.
Ons begin altyd op 25 Februarie rooibossaad saai. Teen 15 Junie is die saailinge gereed vir plant. Ons kan met 1 kg saad saailinge maak vir 12 hektaar tee. Ons volg ’n agtjaar-rotasiestelsel. Ná die vierde oes in ses jaar slaan ons die rooibosplante met ’n bossiekapper fyn, daarna ploeg ons alles uit en laat die plantasie vir drie jaar rus.
Ons saai rooibossaad met die hand. Ses heeltydse werkers plant ook saailinge met die hand, terwyl vroue tussen die rye tee skoffel. Daar is rooibosboere wat oesmasjiene gebruik, maar ek glo nie ons sal handsny met sekels vervang nie. ’n Span Tswanas kom sny jaarliks tee en hulle is só produktief dat hulle omtrent die span by die kerwer en op die teebaan laat bontstaan.
