Jogurt, drinkjogurt, versoete kondensmelk en gegeurde, gekleurde en versoete melk is nie op die lys van produkte wat aan suikerbelasting onderhewig is nie, berig die Melkprodusente-organisasie (MPO) se nuusbrief, Melkbulletin.
Melk SA se projek vir regulering en standaarde het vroeër 'n versoek tot die Nasionale Tesourie gerig dat suiwelprodukte vanweë hul voedingswaarde van suikerbelasting kwytgeskeld moet word.
Mnr. Alwyn Kraamwinkel, uitvoerende hoof van die Suid-Afrikaanse Melkprosesseerdersorganisasie (Sampro), sê in 'n brief daar kan dalk onsekerheid oor gegeurde, gekleurde en versoete melk wees. Dié produkte is voorheen deur die Suid-Afrikaanse Inkomstediens (SAID) as hoofstuk 22-produkte in 'n skedule van die Doeane-en-Aksynswet geklassifiseer. Dié hoofstuk maak vir “koeldranke, spiritualieë en asyn” voorsiening.
